1Cor 15 | BJR | STEP | Óo qiní qíkaqaafasaa óoqai qinée Pauroosa Yísuna ámiqira fasaasa ufa qímannimiafannana, ínnee miná irisée maqéeiafanoo ínni írirafa minásaa rusísoofa mapukínoo márinara ínni náaqoo áuqaidaqa.

1 Corinthians 15

Yísufa kúqiranakiqari fíndifunara koorooídanoo.

1 Óo qiní qíkaqaafasaa óoqai qinée Pauroosa Yísuna ámiqira fasaasa ufa qímannimiafannana, ínnee miná irisée maqéeiafanoo ínni írirafa minásaa rusísoofa mapukínoo márinara ínni náaqoo áuqaidaqa. 2 Yísuna ámiqira fasaasa ufa qímannimiafannana, ínnee miná rakísi mapukú qumáreeqa innaarúnai asumu márirana máree maríafanoo. Ábee ínnee indaarú kúqaa fee íriqee íqau únna qímasee íridee qifáara.

3 Qinée sía qinée qeeqá ufa káifau qímannimiafannanau. Yísuna áiku ásauku máriannaindari ánu ufana firaaqóo úriqarara ufa qímannimiafannana. Mi-ufána óosana maaqímminoo máridanoo. Ásauku mundírafa tamummáqara fasiqauqa ákarakinaa ufamau fínoo maasá mandáinainara kuquqímaqanau. 4 Kuqufufaqá misá miná irí akúndamásoofanoo qaaramoo fáasaana márinoo tamummáqara fasiqa ákarakinaa ufamau fínoo kúqiranakiqari fíndifinau. 5 Fíndifufanoo Peetooroona áfusaa koorooínoo miqóoqari qísaukuqara taikáseenoo qíkunní óoqu qaaraqánda máreenoo niqiqáaninna fasiqausa aiqáma nífusaa koorooufaqa qáfaqau. 6 Qáfamasoofanoo miqóoqari narí ufa írimarusa fáifa handaréeta fasiqa anaesee moómoo uqanna nífusaa moodáa kari kai kooroo inau. Misáuqakiqari akaqáusa asooqáqee kuqufufaqa, moómoosa káqi máridaqa. 7 Miqóoqari Yísufa Yameesana áfusaa kooroomámbinoo miqóoqari niqiqáaninna fasiqausa nífusaa kooroomámbinoo qímanniminau.

8 Ínaaqianna uqanna qiní Pauroosa qífusaa faqa koorooináu. Qinée dáaduma uqanna moo óosanakiqari ámaneendaraasa eedádara foora máriafanausa máridaqa Yísufa qiní qífusaa kambíqoofaqa qáfaqiafana. 9 Qinée Yísufa niqiqoo fásiqausakina uréeqarausa máridaqa. Qinée Ánutuna ufara suqímariasa aupúrarana nímiafanausa márunnanara náqi fee ifaqée misá qiníara Yísufa niqiqoo fasiqafee qída fee, sía qinée misá nimana máridaqa. 10 Ánutufa sía qiní uréeqaranara írinoo káqi narí áfauaranannai qiní maréeqeenoo narí niqiqoo fásiqausaki quqáqiséenoo ufa qímannimiannee afeeka qímufanoo sía qiníki mandáikinau. Qinée aiqáma niqiqoo fásiqausa úrinaaqaramásee faiqí ánaaseeki maqúsa maqusa kadáapiriqa, sía qeeqá kaifau miqídau Ánutufa qímu afeekáfa qiníki kásinara miqídaqa. 11 Yísufa maasára kúqinoo fíndifunara qímannimunnufana akaqá niqiqoo fásiqausa nóokinaanee íridee qiní dóokinaanee íridee, mi-ufána kai maasá qímannimisaafanaqa minásaa ínni írirafa rusínoo máridanoo.

Maasá kúqiranakinaana fíndifuannánara qídanoo.

12 Maasá ásauku mundírafa kúqiranakiqari fíndifunara maasá qímannimiafanaqa ínnikiqari akaqáusa náqimasee kúqirausara sía fíndififaranoo fee qída fee. 13 Kúqirausa kásooqaqee sía kúqiranakiqari fíndifirarifánoofau ásauku mundírafa miqí kai ínoofau sía fíndifu qini. 14 Óoqai ásauku mundírafa kúqiranakiqari sía fíndifinaqau maasá qímannimira úfafa sía márinaqau sía qímannimunáiqini, ínnee ínneeqa írirana rusímari ainainafa sía máriqini. 15 Kúqirausa kúqiranakiqari sía fíndififanoofau ásauku mundírafa faqa sía fíndi fiqini. Ánutunara ásauku mundírana kúqiranakiqari uqéeree foo qíafannanara kúqirausa kúqiranakiqari sía fíndififaqau maasá qímannimiafanna ufanara únna ufa fee qini. 16 Kúqirausa sía fíndi fífaqau ásauku mundírafa faqa sía fíndifiqini. 17 Ásauku mundírafa kúqiranakiqari sía fíndifinaqau ínniqa saqárikirafa kai fífau ainainara foora sía mári ainainnaki faqa ínnee ínneeqa mandáinainaki káqi auíamakifau fúrufarammiaqini. 18 Kúqirausa kúqiranakiqari sía fíndififaqau moómoosa ásauku mundíranasaa írirana rusísaida kúqimariasa sía innaarúnai fini auíamakífau fúrufariaqini. 19 Maasá maaqóo márunna kámuqoorá kai iriséefau ásauku mundírana minásaa írirana rusídau, maasá mandáinaina firaafá máriqini, aiqáma máqannaasa maqá afaaqasása máriasakiqari maasá dinee teeroo úriqaranoo máriqini.

20 Ánoona ufa maaqímminoo máridanoo. Dóo kúqaa ásauku mundírafa kúqiranakiqari fíndi finau, miná fíndifirafa maasá kúqirausa fíndifirana qíma afeekaikídanoo mapukídanoo. Dóo kúqaa máridanoo. 21 Óoqai indaarú moodáa fasiqannai kai kúqirana kambíqanau, miqí kai ínoo moodáa fasiqannai kúqiranakiqari fíndifirafa kambíqanau. 22 Maasá aiqáma fasiqa anaasee Adamana faiqi námu márunnanara kúqidaqa, miqíkai ínoo ásauku mundírana faiqi námu márianara Ánutufa misá kúqiranakinaana uqéera quqáannoo. 23 Sía dapi dápi Ánutufa kúqiranaki uqéeraannoo andeeqáseenoo mara fíndifuannoo, ásauku mundírana náaree dóo mara fíndifumáqoofanoo máridanoo miqóoqari mifá qúminna aukuana miná áiku ásauku maréeqee fíndifumánnimaqaannoo. 24 (-) 25 Ánutufa narí ásauku mundírana mapukú amaqáseenoo qímaminau. Anée aiqáma ainainasaa rakísimaree fímarinaqa qinée Ánutusa aiqáma namuqáa áfaannainaina maréeqeeqa aní ásauku mundírana áramandunnai quqásaanana anée maqá mámmaaqai radámusainaqa kaifáa rakísianauranoo. 26 Ínaaqianna radámuaninna namuqaafa kúqirafa máridanoo miná faqa radámuannoo. (v 24) Miqóo taikárafa kambíqaannoo Ásauku mundírafa áfaannauqa úriqararausa faqa misá faiqí firaasá faqa misá afeeka fasiqauqa aiqáma maréeqeenoo narí áramandunnai quqáseenoo radámuseenoo narí quqúsakinaasa aiqámausa maréeqeenoo narí ákoona ámiannoo.

27 Tamummáqara fasiqausa ákarakinaafa minára maaqímminoo máridanoo.

Ánutufa aiqáma ainaina miná áramandunnai kai quqáannoo fee qídanoo.
Tamummáqara fasiqa minára miqí qímasoofaqa qinée minára maaqí qídaqa. Ánutufa aiqáma ainaina miná áramandunnai quqáraree qídanoo sía naríarau miná áramandunnai quqáraree qídaqinoofau. 28 Ánutufa aiqáma ainaina maréeqeenoo ásauku mundírana rakísirana ámeemaanai quqásainanoo ásauku mundírafa miná ámaaku fannoo quándaki Ánutuna áramandunnai narí kéeqaannoo, aiqáma ainaina quqóona áramandunnai kéeqafinanoo miqóoqari Ánutufa aiqáma ainainatia uqanna úriqararafa máriannoo.

(Pauroofa máru aukuanna faiqí moó fannoo Yísuna ufa írimarufa sía nammári márarai kuqufufanoo moó fannoo qaara kari nammári máree márinau. Mifá naríara faqa kúqunara faqa máree marínau. Mi-aukuanná mi-oosannára Pauroofa qímannimirara maaqí qinau.)

29 Ínni Koorinti máqannaasaki kúqirausara nammári máree marusara misára náqi fee qianáuree. Kúqirausa kúqiranaki sía fíndifuafaqa ínnee nánaree fífau misáree qímasaida fífau nammári máraidee. Ínnee yánee dadaaqídee miqídee. 30 Maasára faqa íriaqa maasá Yísuna ufa sáara aiqáma faasaana moómoo kari aupúrarana nárírana eeráirirana máraidaqa. 31 Qiní qíkaqaafasaa, qinée aiqáma faasaana kúqiranara aniráannoo qídaqa eeráiridaqa. Qinée sía káiqeesa maaná koorooídaqa. Ínnee maasá karaambáiqa ásauku mundírana Yísunaki fímaríanara nimooídaqa minára kai kooroománnimidaqa.

(Pauroona aukuana Roomma máqannaasa sía Yísuna ufa írimariasa nári óosana máraidaqa faiqí ánaasee qáfaifanoo adíafaa íanifee qímasee óoni faandamuraki faiqí faqa káasau aandau faqa mara quqásoofaqa rákimariqau. Yísuna ufa írimaru úfafa taikáanifeera mara quqásoofanoo káasau aandau naru néemarinau. Pauroofa minára iriséenoo Koorinti máqannaasa qímannimidanoo miná kíkiqusimarinau. Koorinti máqusanaasa maa-ufána qímanniminoo qinau.)

32 Qinée Pauroosa Eefeesusa máqusai káasau aandaura foora márufaqa misá faqa rákimariqiafana. Kúqirausa sía kúqiranakiqari fíndififaqau qinée maaqóo Eefeesusa máqusai mi-fasiqáusa faqa rákidaqa nána ainainee máraanauree qímasee misá faqa rákiqiafana, fífau maaqóo mária fasiqaanaaseesa qíqafaaqee qímasee fee rákiqiafana. Óo sía miqí qiafana. Kúqaa kúqiranakiqari fíndi fuanáuree qídaqa miqí qiafana. Faiqí firaasá únna ufa moó minára maaqímminoo máridanoo. Dúna maasá kúquannanara maqee nárana nammári móomoo náa. Qinée Pauroosa minára maaqí qídaqa. Kúqirausa kúqiranakiqari sía fíndififaqau ánoonammifooqíni, fíndififaranoo únna qímariafanoo.

33 Ínnee sía mi-unna ufána íriaqa,

Moo ámaana ufa minára maaqí qídanoo, Mandóosana máree maría áqoondisa ínni márirana putaamánnimaqéefaranoo.
34 Ínnee Koorinti máqannaasaki akaqáusa kúqirausa sía fíndifi maría ufana qímariasa ínni putaamánnimaqaifaqa ínnee misá mandóosana maraséeqa fúrufarirana máree maríafanoo. Ínnee miná minnísee kafáa andeeqára írirana marasée ínneeqa mandóosana quqásee andeeqáramau fuaqa. Ínneeqa nisaurúaqa ínnikiqari akaqáusa Ánutuna afeekara sía ámiqimasee íri márifanoo káqi meerámau írirana írimariafanoo.

Maasá kúqiranakiqari fíndifuanna qífaaqanara qídanoo.

35 Ínniki moó fannoo kúqirausa fíndi fíranara maaqí qíannoo, kúqirausa dóo putaámminoo máridanoo náqimasee fee fíndi fifáree, nána afaaqee fíndi fúannoo fee. 36 Anée fúrufarimarianafa mi-ufána qímariananoo. Anée nandí úmmaqusainanoo sía aaqee kambíqaannoo mifá putaa mámbinanoo miná uapáaqi fannoo ínaaqiana kambíqaannoo. 37 Ínnee sakuma qaqama fée moo nárana qaqama fée úmmaqidaqa sía nárana faqa ámanee faqa úmmaqi maríafanoo qaqama kái úmmaqi maríafanoo. Úmmaqusaafanoo sía qaqama kai kambíqaidanoo nárana ánoona namufaqa ámanee namufaqa kambíqaifaqa qáfee maríafanoo. 38 Ánutufa narí íriranannai aiqáma áadu áadu qaqama nári áadu áadu kambíqaaninnana ánoona namufaqa ámanee namufaqa nímidanoo. Ánutufa aiqáma qaqama andeeqásee narí kai ánoona ámidanoo.

39 Kásimari ainaina nimaqí miqí kai ídanoo sía aiqáma moodáa nimaqi faqaasa máridaqa. Faiqí moo nímaqi faqaasa máridaqa aandáu̱ moo nímaqí faqaasa máridaqa, ufini moo nímaqi faqaasa máridaqa, noodáanna moo nímaqi faqaasa máridaqa.

40 Innaarúnaindaraa nifaaqa faqaasa faqa maqásaaqaraa nífaaqa faqaasa faqa áaduma máridaqa. Innaarúnaindaraa nífaaqa áreenarafa moó máridanoo maqásaa qaraasa nífaaqa aréenarafa moó máridanoo. 41 Súani afu narí aréenarafa áaduma moó máridanoo, quqoona narí aréenarafa áaduma moó máridanoo, fásau narí aréenarafa áaduma moó máridanoo, fásau misáki faqa áadu áadu áreenarafa máridaqa.

42 Kásooqaqee kúqirausa kúqiranakiqari fíndififanoo miqíminoo máriannoo. Faiqí ánaasee kuqufífanoo miná irí ákundee maríafa maqásaaqaraafa maqá máridanoo. Kúqiranakiqari Ánutufa uqéerasainanoo mi-afaaqáfa náaru náaru márira afaaqa máriannoo. 43 Níkundee marí nifaaqafa ummooqukídanoo mandáikidanoo, kásooqaqee kúqiranakiqari Ánutufa uqéerasainanoo áfu qáfainanoo idaaqírafa ámiqirafa afeeká máriannoo. 44 Níkundee maría nifaaqafa maqásaaqaraa nifaaqa úfaasu márifa máridanoo. Ánutufa uqéerasainanoo náaru márianinna innaarúnai nífaaqa máriannoo. Maqásaa nifaaqa úfaasu nifaaqa maaqóo máriana amana kái márifa máridanoo. Mifá márinanoo innaarúna náaruara márira nifaaqa amana kái márifa kúqaa máriannoo.

45 Tamummáqara fasiqauqa ákara minára maaqímminoo máridanoo.

Indaarúqaa fasiqa Adamafa kásimaruna áuquqoofa márinau.
Qinée Pauroosa minára maaqí qídaqa. Adamana ánaaqiannaa fasiqa Yísufa maqee márirana faqa náaru márirana faqa nímimari maraqunafa máridanoo. 46 Sía náaru márirafa náaru kambíqaidanoo maqásaaqaraafa náaree kambíqaidanoo, miqóoqari kai náaru márirafa kambíqaidanoo. 47 Indaarúqaa Adamafa maqásaaqaraa kookoomannái áuqirafa márinau. Ínaaqianna Adamafa Yísufa innaarúnaindari qúminau. 48 Maqásaaqaraasa nári níkoona Adamana fooqáasa maqá nífaaqafaqaasa máridaqa. Innaarúnai fímariasa innaarúnaindaraa fasiqa Yísuna afaaqaikírausa márifaranoo. 49 Maqee maasá maqánnai áuqira fasiqa afaaqa afisíqa moodáa karámmiqa máridaqa kásooqaqee maasá miqíkai másee innaarúnaindaraa fasiqa afaaqa afisúsee miqí kai íqa moodáa karákaimmianaura.

50 Óo qiní qíkaqaafasaa qiní Pauroosa ufa ánoona maaqímminoo máridanoo. Faiqí nimaqí faqaasa faqa fidíka faqaasa faqa sía Ánutuna quqúsaki kéeqafifanoo náida nímiannoo. Úfaasu maqásaa ainaina faqa sía amana náaru márirana máraannoo.

51 Ínnee ámiqimmandee íriaqa, kukéeqara ufa qímannimianaura, maasá sía aiqáma kúquanaura. Qúsasaa uqanna Ánutufa tautúmaqimaqáseenoo maasá moo kámaakamma qímaqaannoo. 52 Nífu tasúnduna tasúnduna káqi káqi ídanoo miqírafa kai ínaaqianna ufíreena fannoo fuaqáinanoo Ánutufa maasá moo kámaakamma qímaqaannoo. Mi-ufireenná fuaqásainanoo kúqirausa minakíqari náaru márira nifaaqa faqaasa fíndififanoo maasá aiqáma moo kámma qímaqaannoo. 53 Úfaasu maqásaa nifaaqa faqa sía káqi óoru fífaranoo náaru márirana náaree afisúmareeqa óoru fífaranoo. Káqi máriasa kúqifandinausa misá afeeka nipata náaree afisúmaree amaná innaarúnai óoru fífaranoo. 54 Úfaasu maqásaaqaraa nipata faqaasa kúqifandínausa náaru márira nifaaqa sía kúqimaria nifaaqána afisúmareeqa dóo miqóo óoqeenáasa ákara ánoona kambíqaannoo. Misá maaqí qiqau.

Ánutufa dóo kúqirana aiqáma nambíqama taikáseenoo miná úraaqáranoo máridanoo.
Kúqirana rafáaqafírafa dóo taikéenoo.
Kafáa moo ákarakinaa ufa minára maaqí qídanoo.

55 Óo kúqirafa maasá rafáaqafímarianafa aní úriqarara afeeka yáifee máridanoo. Dóo taikéenoo.
Óo kúqirafa aní aupúrara afeeka maasá qímimarianafa yáifee máridanoo. Dóo taikéenoo.
56 Ákara miqínoo márifaqa qinée Pauroosa minára maaqí qídaqa. Maasá aiqámausa mandóosana fannoo kai aupúrara afeeka kuqirana ámifanoo dóo kúqirafa maasá dáridanoo. Kafáa mandáinaina fannoo miná nárira afeeka Ánutuna nímaarusira sándufakiqari kambíqaidanoo. 57 Óo Ánutufinnai dúfi dúfi qídaqa. Maasá ínni sáimbaqa karaambáiqa ásauku mundírana Yísunannai kúqirana faqa mandáinaina faqa maasá úriqaraqa máridaqa.

58 Óo qiní qíkaqaafasaa dóo minára iriséeqa sía kási kásiaqa mapukúseeqa atukaráqa máriaqa. Karaambáiqa márirana nírana máriana maqee maqee minakí kai nóori runúsee máriaqa. Karaambáiqa márirana níranaki márianara aiqáma saika náaru márira anoona márifa máridanoo karaambáiqa márirana nírana sía moó fannoo ánoona síaifa máridanoo. Ánoona márifa kai máridanoo.